10. klasea

Animaliei buruz, oina emanda puntua sortzen

Hasteko, Julio Sotoren "Txintxarritxo ardia" sorta abestuko dugu. Sortak ekarriko dizkigu gaur gure kantagaia izango dena (animaliak eta natura) eta erabiliko dugun kopla doinua ("Goizian goiz jeikirik"). 

Hankaluzeak eta hankamotzak neurriratzen trebatuko gara ondoren:

• "Txintxarritxo ardia" sorta trakets idatzita emango zaigu: hankaluzeak eta hankamotzak identifikatu eta zuzendu beharko ditugu, doinuan tajuz sartzeko. Neurri akatsa antzematean, ia akordura etortzen zaigun Sotok nola abesten zuen! Esateko beste molde bat asmatzea ere balekoa da, baldin eta neurrian egoki sartzen badugu.
• "Hankaluze eta hankamotz" jolasean, etxeko animalia bakoitzari botatako kopla entzungo dugu: ea asmatzen dugun zein neurri akats duen kopla bakoitzak! 

Behin neurriari tamaina hartuta, pauso berri bat emango dugu gaurkoan: oina emanda, puntu osoa sortuko dugu. Pausoa progresioan emango dugu, "Fauna txiki bat" eta "Goazen mendira!" karta jokoekin. Izan ere, lehenik puntu erdika ariko gara eta, karta jokoaren bigarren zatian, oina emanda puntua sortzen ariko gara.