Puntuari punpa laster erantzun, oina emanda
Hasteko, bideoz ikusiko dugu ereduzko bertsoaldia: "Galdera erantzunetan, sukaldaria eta kritiko gastronomikoa". Egañak, gastronomiako kritikariak, galderak egingo dizkio Lizaso txefari, ea jatetxean dena punttuan eta tajuz duen. "Ikusi nuanean" doinuan entzungo ditugu, puntu erantzunetan: Egañak galdetu, Lizasok erantzun, erritmoa eten gabe!
Gero doinu horretan ariko gara gu ere, bertsolarien jolas berbera egiten:
- "Elikadura osasuntsua" karta jokoak lagunduta, puntuari punpa laster erantzutea izango da gure erronka. Gure erantzuna sortzeko, oina emango zaigu. Horretarako, kartekin horrela antolatu gaitezke: karta bi lagunen tartean jarriko dugu. Batak puntua abestuko du (kartaren barruko aldea bere alderantz jarrita) eta bitartean, beste lagunak, kartaren atzeko aldean oina izango du bistan (horixe baliatu dezake, erantzuteko).
- "Tutti Frutti" jolasa egingo dugu gero, karta jokoaz. Mahai gainean, frutak dituzten kartak bistaratuko ditugu. Kide batek, puntuak jarriko ditu (puntuak dituzten karta multzoak eskutan hartuta): ea lagunek asmatzen duten, mahaian bistan ditugun fruten artean, zeini buruz ari den. Erantzun zuzenak errimatu egiten du. Zein fruta den esanaz, bigarren puntua abestea izango da gure lana. Erantzuna zuzena bada, fruta hori guretzat... Ea nork lortzen dituen karta gehien!
