Hitz batetik esaldia sortzen
Horretarako "Errima kartak" erabiliko ditugu: karta multzotik, aldiro karta bat atera eta egokitu zaigun hitzarekin, esaldi bat sortuko dugu, bat-batean.
Hitza esaldiaren amaieran jartzen
"Errima kartak" erabiltzen segiko dugu, baina oraingoan egokitu zaigun hitza esaldiaren amaieran jarri beharko dugu (esaldia berrantolatuz, hitza oin gisa baliatzeko).
Esaera zaharrak osatzen
Ikasi dugu oina esaldiaren amaieran jartzen. Beraz, orain, bi esaldi errimatu lotzen ariko gara, esaera zaharrak sortzeko.
"Esaera zaharrak osatzen" txartelak hartuko ditugu. Txartel bakoitzean esaldi bat emango zaigu eta gure egitekoa errimatzen duen esaldia identifikatzea izango da, bi txartel lotuz, esaera zaharra osatzeko. Behin esaerak osatuta, ea gai garen bakoitzaren esanahia azaltzeko: zein egoeratan erabiliko genuke, esaera bakoitza?
Zirtoak osatzen
Bukatzeko, zirtoak zer diren ikasiko dugu:
- Lehenik, zirto zaharren ereduak bideoan ikusiko ditugu: Pello Errota eta Mikela Elizegi bertsolariak, apartak ziren zirtotan ere. Goza dezagun euren erantzun errimatuekin!
- Guk ere gure zirto elkarrizketa sortuko dugu, "Zirto komikia" txartelekin. Egoera hauxe emango zaigu, elkarrizketa errimatua sortzeko: Komunaren barruan gaude, lasai eserita, denbora luzean. Laguna txisa larrituta etorri da eta ate joka hasi zaigu. Aldiro, lagunak esaldi bat botako digu; guk errimatuz erantzun egin beharko diogu. Txartelean emango zaigu guk zer erantzun behar diogun, baina errimatzeko moduan berrantolatu beharko dugu esaldia: errimatzen duen hitza, esaldi amaieran jarriz! Zirtoak osatu ditugunean, abestu ere egin genitzake: esaldiek kopla txikiko neurria dute-eta! Bukatzeko, zortziko txikian ere abestu genitzake: erabaki dezagun, horretarako, lau esaldiak (edo "puntuak") zein ordenatan antolatu...
