Asmakizunetan, puntuari erantzuten, 2 oin aukeran emanda
Hasteko, bideoz ikusiko dugu ereduzko bertsoaldia: "Hitzak asmatzen". Andoni Egañak eta Unai Iturriagak hitz ezkutua zein den asmatu beharko dute, galdera-erantzunetan; batek galdera botako dio puntu batean, eta besteak pistak emanez erantzungo du. "Ikusi nuanean" kopla doinuan entzungo ditugu.
Gero, bertsolariek bezalaxe, asmakizunetan jolastuko dugu guk ere, doinu berberaz.
- "Asmakizunak -objektuak" karta jokoaz ariko gara. Karta batean deskribatu beharreko objektua emango zaigu, eta pistak eman ditzagun 2 kopla botako ditugu; lehen puntua emango zaigu eta guk bigarren puntua sortu dezagun, 2 oin izango ditugu aukeran. Ea gure bi koplak entzunda, entzuleek asmatzen duten zein objektu den! Adi: bigarren koplak errimatu egiten du-eta, erantzun zuzenarekin.
- "Pasa hitza" karta jokoaz, asmakizunetan amaituko dugu gaurko saioa. A-tik Z-ra, hitz ezkutua zein den igarri beharko dugu. Horretarako, puntu batean pista emango zaigu eta guk zer den esanaz erantzun beharko dugu. Adi: erantzun zuzenak errimatu egiten du-eta!
