Espainian behera
han dago Zamora
basamortu hoberik
nonbait izango da.
Ez mendi ez itsaso
ez belar ez lora
hementxe bizi behar
hainbeste denbora
hain maite dugun Euskal
Herritik kanpora.
Doinuaren berri
Doinua eibartar batzuengandik jaso zuen Amurizak, “Agur sagar beltzeran” liburuan dionez. Eibartarrek doinu honetan abesten zuten Bilintxen “Potajiarenak” sorta (“Egunaren izena” doinuaren ordez).
Bertsoaren berri
“Bertso berriak horma zaharrei jarriak” sortakoa da bertsoa; 1972an idatzi zuen, kartzelako berri emanez (artean apaiza zela). Izan ere 1968tik aurrera, Francoren diktadura garaian, zazpi urte egin zituen preso Amurizak, hiru espetxealditan. Gerora, sorta hau “Menditik mundura” kasetean ere zabaldu zuen (1978).