Mutil koxkor bat itsuaurreko
zuela aldamenian
gizon burusoil bizar zuri bat
bi makuluren gainian
kale ertzian ikusi nuen
inora ezin joanian
ta bera nor zan jakin nahiean
inguratu nintzanian
limosnatxo bat eskatu zidan
Jainkuaren izenian.
Doinuaren berri
Doinu hau neurriz nahi adina luzatu izan dute bertsolariek. Hamabi puntuko bertsoa ere bota zuen “Basarri”k, 1960ko Txapelketa Nagusia irabazi zuenean, azken agurrean.
Bertsoaren berri
Bertso honen egilea: Pello Mari Otaño (1857 Zizurkil, Gipuzkoa – 1910 Rosario, Argentina).
“Limosnatxo bat” sortaren lehen bertsoa da hau. Sortak azaltzen du eskale zahar baten nahigabea, gaztetan odol beroz gerrara joan izanagatik; itsu eta eri itzuli zen gerratik. Pello Mari Otaño gaztea zela II. Karlistaldia piztu zen eta 18 urterekin Argentinara joatea erabaki zuen, seguru asko gerratik ihesi.