Urepeleko artzaina zen Xalbador. Bere bizimoduari eta ardiei zien maitasuna azaltzen du sorta eder
honetan. Hitzok abesteko nor egokiagorik, Erramun Martikorena artzaina baino?
1.
Mendian sortu bainintzan laguntzat ene bizitzan artaldea dut nik izan haur nintzaneko, aitak erranik ardiak goberna nitzan plantatu nintzan artzaintzan mundu hunetan gabiltzan gizon xumeen langintzan.
2.
Geroztik ene bizia izan eguzki xuria ala elur erauntsia santa sekula pentsatu gabe zer dutan irabazia hola deramat guzia: ardier erne begia bihotzez heier josia.
3.
Udak ardia derama libro oihanetan barna orduan ez naiz ni jauna. Libertatea Jainkoak baitu denen gogoan emana uzten diotet baimena. Nola dezaket kondena nihaurek maite dutana?
4.
Neguan sartzearekin artzainak badu zer egin bai eta ere atsegin: ate ondoan ikusi baitut ardi bat bi bildotxekin hantxe bertze bat batekin urruntxago bida erkin zoin uros naizen nork jakin?
5.
Munduko izaitetarik gaur eta egundainotik bildotxa da eztienik. Bati nik hauxe galdetu diot musu bero bat emanik: “Nor da gutan dakienik zoinek zaituen maitenik: zure amattok edo nik?”
6.
Ez da atzoko kondaira doa bi mil’urtetara jakintsunen arabera: bildotx bat hartu besotan eta artzainak ziren atera aingeruekin batera Eguberri goiz aldera Jesusen adoratzera.
7.
Bildotxa Jesus Haurrari eskaintzen izan denari Jaunak emaiten du sari ardi bildotxik duen herria ez da arras urrikari: direlakotz maitagarri berak ditugu lotgarri sortu gaituen lurrari.
