Bertsozale.eus | Bertsoa.eus | BDB | Bertsoikasgela Bertsozale Elkartea
Bilaketa lupa Bertsoeskolak Bertsoeskolak

Aiako Harritan

Aiako Harritan
Basarri 1936ko gerran, ihesi, Frantziara joan zen itsasontziz. Amak eskatuta, Zarautzera etorrialdi bat egin zuenean ordea, salatu egin zuten eta “Batallon de trabajadores”-etan sartu zuten preso: langileak esklabu lanetan edukitzen zituzten. Basarri Aiako Harrien magalean, Aritxulegiko mendi-lepoan zegoen “Batallon de trabajadores”etan eduki zuten, Oiartzundik Lesakarako errepidea eta tunelak egiten. Une gogorretan umore onari eutsiz jarri zituen bertso hauek Basarrik. Gerora, sorta hau askotan abestuko zuten Uztapide eta Basarri lagunek elkarrekin, bi ahotsetara, otordu osteetan.
1.
Nork egin du gure galde?
Aiako Harritan gaude
baina beti bezain trebe
tralarala, tralarala
lanean gogoz aritzen gera
soldatarik jaso gabe
berrehun nagusi badaude
gure artaldean jabe
guk umore ona halare!
tralarala lara…
Guk umore ona halare!
2.
Hotz-aldi eta goseak
ta barau egun luzeak
guk baditugu paseak
tralarala, tralarala
gorputzari on egiten nunbait
gailur hontako haizeak
nola baigeran gazteak
sano dauzkagu hesteak
ez egonarren beteak.
tralarala lara…
ez egonarren beteak.
3.
Goizean ekin lanari
egunsentian pozgarri
txori guziak kantari
tralarala, tralarala
ezin atera gentzake orain
inoiz adinbat izardi
erdietan gaude geldi
ahal degunean exeri
zertan nekatu gehiegi?
tralarala lara…
zertan nekatu gehiegi?
4.
Oiartzungo neskatilak
muxu-gorri biribilak
izan zaitezte abilak
tralarala, tralarala
zertan maitatutzen dituzute
kaleko ume zirtzilak?
Aitxulei-n daude trankilak
saltzeko dauden opilak
pare gabeko mutilak.
tralarala lara…
pare gabeko mutilak.

Gaiari buruzko informazioa, hemen.