Hasteko, Estitxu Arozenaren "Familia desberdinak" sorta abestuko dugu. Sortak ekarriko dizkigu gaur gure kantagaia izango dena (etxeko kideak) eta erabiliko dugun kopla doinua ("Goizian goiz jeikirik").
Hankaluzeak eta hankamotzak antzematen trebatuko gara ondoren:
Behin neurriari tamaina hartuta, puntua sortzen ariko gara, oina emanda. "A ze familia" karta jokoaz, etxeko kide bakoitzari kopla bat botako diogu. Laguntzeko, lehen puntua emango zaigu, eta guk bigarren puntua sortu dezagun oina ere bai.
Saioa jolas batekin amaituko dugu, "Bertsolariak" karta jokoa hartuta. Karta bakoitzaren atzeko aldean, puntua jarriko zaigu, bertsolari baten pistak ematen. Guk puntuari erantzungo diogu kopla osatuz, eta zein bertsolari den erantzungo dugu: adi, bere abizenak errimatu egiten du eta! Asmatzen badugu, karta guretzat: ea nork lortzen dituen gehien!
