2019-10-28
Hitzetik Hortzera saioak proiektuari buruzko erreportaia osatu du, Bertsozale Elkarteko Idoia Anzorandia irakaslea elkarrizketatuz. Bere eskutik Abanto Zierbenako Askartza-Isusi eskolara sartuko gara. Ikus dezagun gelan zer egiten den!
Ikasmateriala sortzen ari da, etengabe, Bertsozale Elkarteko irakasle lantaldea. 2011. urtean Bertsozale Elkartearen ikasmaterialak EAEko Hezkuntza Sailaren Ixaka Lopez Mendizabal saria jaso zuen. Egun bertsoikasgela.eus atarian dugu eskura ikasmaterial guztia. Hala, haurrek orain eskolan soilik ez, etxean ere goza dezakete eurentzat sortutako bertsoaldi zein jolasekin.
Bertso-eskoletako irakasleok ere aukera dugu bertsoikasgela.eus atarian gure pasahitza eskuratzeko, hemen. Pasahitzarekin, hainbat baliabide jarriko zaizkigu eskura: haurrentzat sortutako bertso sortak, bat-bateko saio hautatuak, jolasak, haurrentzat doinutegia, sekuentzia didaktikoak, bat-batekoa lantzeko fitxak, bertsolariak, komikiak...
Ikasgela barruko jarduna etengabe hobetzeari jarria dio begia Bertsozale Elkarteko irakasle lantaldeak. Horretarako, batetik, bertsolaritzaren ikas-irakaskuntza prozesua aztertzeko ikerketa bultzatzen ari da eta, honi loturik, irakasle lantaldeetan etengabeko formazioa egituratzen ari da Bertsozale Elkartea.