Udazkeneko III. Zapi Janztea bertso saioa jokatu zuten Zaldibian urriaren 18an, Zubi-buru elkartea entzulez beteta zela. Maialen Lujanbiok, Odei Barrosok, Jone Uriak eta Andoni Egañak kantatu zuten, afal ondoren. Entzuleek Egaña izendatu zuten saioko onentzat, eta aurreko bi urteetako irabazle Lujanbiok lotu zion buruan zapia Egañari.
2019-10-25
80 lagun ingururen aurrean jokatu da II. Bertsokabi-Eugenio Arraiza Sariketa, Iruñeko Herriko Tabernan. Oholtza gainean izan dira Aitor Irastortza eta Xabat Illarregi, Ekhiñe Zapiain eta Josu Sanjurjo eta Irati Majuelo eta Alazne Untxalo. Azken hauek atera dira txapeldun.
2019-10-25
Urriaren 27an Gernika-Lumoko Lizeo antzokian izango da eta sarrerak agortuta daude. Xabi Payak aurkeztuta, bertsoak eta beste zenbait modalitate uztartuko dituzte saioan, gonbidatu bereziekin. Antolatzailea Lilibertso bertso-eskola da, hainbat eragilerekin elkarlanean.
2019-10-21
Nafarroako bertsolari gazteei zuzendutako bikotekako sariketa hau iritsi da azken geltokira: urriaren 24ean Iruñean jokatuko da finala. Aitor Irastortza eta Xabat Illarregi, Ekhiñe Zapiain eta Josu Sanjurjo eta Irati Majuelo eta Alazne Untxalo bikoteak lehiatuko dira.
2019-10-21
"Euskal gaizkileak" podcast seriea ari da eskaintzen Zuzeu orainkari digitala. Kapitulu bakoitzean krimen bat, gaizkile bat ezagutaraziko digu ahots kontakizunak, eta berau gordetzen duen kantua edo bertso sorta. Martin Larralderen bizitza eta bere "Galerianoaren kantua" entzungai, kapitulu honetan.
2019-10-21
Hezkuntza arautuan euskal kulturaren transmisioak dituen erronkez egun osoko jardunaldia egin zen urriaren 19an, 110 kiderekin. Kulturgintza eta hezkuntzako hainbat eragilek hartu zuten parte, eta Bertsozale Elkarteko esperientziaren berri eman zuen bertan Mikel Artolak. Antolatzaileak Jalgi, Azpeitiko Udala, Hik Hasi, Elkar fundazioa, Ikaselkar eta UEU izan dira.
2019-10-21
Bizkaiko bertsolari gazteek hilean behin bertso eskola osagarria jasotzeko aukera izango dute. Izen ematea zabalik dago.
2019-10-14
Lapurdi, Baxenabarre, eta Xiberoko bertsolari gazteei plazak eskaintzeko ekimena sortu da, 8 saioko zikloaz.
2019-10-14
Urtebeteko lanaldi erdiko jarduna eskaintzen da. Curriculuma aurkezteko epea azaroaren 20ra arte dago zabalik.
2019-10-14
Ane Labakak "U-morez" hitzaldia eskainiko du Lesakan, urriaren 18an, 17:30ean, Bortzirietako Bertso-eskolak antolatuta. Bertsolaritzan garatutako umorea(k) izango ditu aztergai, genero ikuspegitik.
2019-10-14
Lanak aurkezteko epea azaroaren 17ra arte dago zabalik. Teodoro Hernandorena Kultur Elkarteak eta Harituz Tolosaldeko Bertsozale Taldeak elkarlanean antolatu dute.
2019-10-07
Aurten ere, azken urteetako joerari eutsiz, 50 haur inguruk eman dute izena Tolosaldeko bertso-eskoletan eta Harituzeko kideak "pozik" daude jendearen erantzunarekin. Hala ere, jakinarazi dute oraindik izen-emate epea zabalik dagoela eta eskualdeko haur eta gazteak izena ematera gonbidatu nahi dituzte.
2019-10-07