Irailak 25 - urriak 3, egitarau betea Altzako Bertso Aroan

XX. edizioa bete du Altzako Bertso Aroak eta emanaldiz oparo dator.

Donostiako ziklo honen antolatzaileak Altzania Kultur Elkartea, Altzako bertsozaleak, Bizarrain eta Donostia Kultura dira.

Ekitaldi guztietan lekuak aurrez erreserbatu behar dira Casares Kultur Etxean: telefonoz (943 351149) zein posta elektronikoz (casareskulturetxea@donostia.eus).

Egitaraua

Irailaren 25ean Erradikalak ginen antzezlana taularatuko du Ane Labaka eta Beatriz Egizabal bikoteak. Emanaldia iluntzeko 20:00etan hasiko da Tomasene Kultur Etxean.

Irailaren 26an 6-12 urte bitarteko haurrentzat Bertso jasa, bat bateko jolasa eskainiko dute Amaia Agirre eta Haritz Mujika bertsolariek. Publikoaren parte hartzea behar-beharrezkoa izango da arratsaldeko 18:00etan Larratxo Kultur Etxean hasiko den ekitaldian.

Irailaren 27an, Plaza Gorrian egingo da bertso jaialdia eta oholtza gainean laukote hau arituko da: Aitor Sarriegi, Maider Arregi, Nerea Elustondo eta Unai Iturriaga. Gai-jartzaile lanetan Gorka Segurola. Saioa arratsaldeko 18:00etan hasiko da. Saioaren amaieran Bertso Paper lehiaketaren sari banaketa izango da. Eguraldiak laguntzen ez badu, ekitaldia Larratxo Kultur Etxean egingo litzateke.

Urriaren 3an Gorria ikuskizuna eskainiko dute Miren Amuriza bertsolariak eta Askoa Etxebarrieta La Pulga dantzariak, bertsoa eta flamenkoa uztartuz. Larratxo Kultur Etxean izango da, iluntzeko 20:00etan. Sarrerek 5 euro balio dute eta salgai daude online eta leihatila fisikoetan.

Babes eta higiene neurriak

Ekitaldiotan COVID 19aren harira ezarritako osasun eta higiene arauak uneoro errespetatu beharko dira, eta antolakuntzak hiritarren laguntza eskatuko du bertaratutakoen esperientzia onena ziurtatzeko. Hona hemen aintzat hartzeko hainbat kontu:

• Garaiz iristea gomendatzen da, eserlekuetara ahalik eta erosoen iristeko. Ilaran itxaroten den bitartean segurtasun distantzia mantendu beharko da.
• Bertso jaialdia aire zabalean izango da, esparru mugatu batean, sarrera kontrolatuarekin eta edukiera mugatuarekin.
• Helbide elektronikoa edo telefonoa eskatuko dira, bertaratutakoen erregistroa izateko.
• Eserlekuak zenbakituak izango dira eta iritsiera-ordenan esleituko dira.
• Ezingo da zutik egon.
• Maskara erabiltzea nahitaezkoa izango da 6 urtetik aurrera. Sarreran gel hidroalkoholikoa erabilgarri izango da.
• Familia edo tutoreak arduratuko dira adingabeek segurtasun-arau guztiak betetzeaz. Bete ezean, esparrutik atera egin beharko dira.
• Irteera mailaka egingo da, antolatzaileen argibideei jarraituz.