Bertsozale.eus | Bertsoa.eus | BDB | Bertsoikasgela Bertsozale Elkartea
Bilaketa lupa Bertsoeskolak Bertsoeskolak
  1. Sarrera
  2. Baliabideak
  3. Izazu nitaz kupira

Izazu nitaz kupira

PDF Deskargatu
Bilintxek, loreek udan ihintza maite duten bezala, maite du neska gazte bat. Neskaren dohainak munduko gauza eder guztiekin konparatuko ditu bertso sortan zehar eta ezkontzeko eskatuko dio. Erreguka amaituko du azken bertsoa: “izazu nitaz kupira!”. Sorta honek doinu aldaera asko ditu; plazan erabiltzen diren bi aldaerak ditugu hemen entzungai, Benito Lertxundi eta Kepa Junkeraren eskutik bata, Kalakan taldearen eskutik bestea.
1.
Loriak udan ihintza bezela
maite det dama gazte bat
hari hainbeste nahi diotanik
ez da munduan beste bat.
Inoiz edo behin pasatzen badet
ikusi gabe aste bat
bihotz guztira banatutzen zait
halako gauza triste bat.
2.
Neskatxa gazte paregabia
apirileko arrosa
izarra bezain dizdizaria
xoria bezain airosa
oraintxe baino gusto gehiago
nik ezin nezake goza
zorionian ikusten zaitut
nere bihotzak hau poza!
3.
Ez al didazu antzik ematen
nik zaitudala nahiago
ai! Marinelak gau ilunian
izarra baino gehiago
nere onduan zauzkadalako
pozez zoraturik nago
zu ikustiak alegratu nau
triste nenguen lehenago.
4.
Nik hainbat inork nahi dizunikan
arren ez zazula uste
nere begiak beren aurrian
beti desio zaituzte:
eguzkirikan ikusi gabe
txoria egoten da triste
ni ez nau ezerk alegratutzen
zu ikustiak hainbeste.
5.
Aurpegi fina, gorputza berriz
ez dago zer esanikan
hizketan ere grazi ederra
ezer ez dezu txarrikan
mundu guztia miratutare
zu bezelako damikan
agian izan liteke baino
ez det sinisten danikan.
6.
Nere betiko pentsamentua
nere kontsolagarria
zu gabetanik ezin bizi naiz
esaten dizut egia:
Zu bazinake arbola eta
ni baldin banintz txoria
nik zu zinaken arbol hartantxe
egingo nuke kabia.
7.
Amoriuak nere bihotza
zureganantza darama
herri guztian zeren daukazun
neskatx bikainaren fama
beste fortunik mundu honetan
ez det desiatzen, dama
haur batek berak izan gaitzala
ni aita eta zu ama.
8.
Falta duenak logratutzeko
hitz egitia txit on du
eta nik ere saiatu bihat
ote gintezken konpondu
gaur nagon bezain atrebitua
sekulan ez naiz egondu
hargatik kolpez galdetzen dizut
nerekin nahizun ezkondu.
9.
Ezkondutziak izan behar du
preziso gauza txarren bat
hala esaten ari zait beti
nere konsejatzaile bat.
Halaxen ere haren esanak
oso utzirik alde bat
ongi pozikan hartuko nuke
zu bezelako andre bat.
10.
Zerorrek ere ongi dakizu
aspaldi hontan nagola
zuregatikan penak sufritzen
bainan ordia hau nola
halaxen ere nigana ezin
bigundu zaitut inola:
Ni zuretzako argizaia naiz
zu neretzako marmola.
11.
Nere bihotza urtzen dijua
eta ez da misterio
penaren kargak estutu eta
zumua kendutzen dio:
begiak dauzkat gau eta egun
eginikan bi errio
beti negarra dariotela
zu zeralako medio.
12.
Zu zeralako medio baldin
juaten banaiz lur azpira
gero damua eta malkuak
alperrik izango dira
behin juan ezkero hoien birtutez
berriz ez ninteke jira
hori gertatu baino lehenago
izazu nitaz kupira!