Merkezurreko hiru lau esaldi txoro nahikoa ekartzeko frustrazio oro. Astindu nahian gure izate ta gogo edozein bihurtzen da arimaren loro, kezko amets saltzaile ta sasipiskologo.
2.
Guraso izan berri baten ondorena: umearen negarra gaueko kondena, iratzargailu hotsak bostetan ordena. Nahiz bisai erdia den begi zuloena “Irripar bat da dagon makilai onena”.
3.
Ukondoak urratu ostean jo ta ke berriz ere penkatu egin duzu mate. Kimikan bi koma bost ta fisikan kate… baina astonauta izan (e)ta bisitatu Marte “Gogor saiatzen denak dena lor dezake”.
4.
Bere ondoan bizkortzen zaizu taupa hotsa, aitortu behar, nahiz ta horrek sortu lotsa! Zuk segi belauniko (e)ta jaitsi kokotza, hori da maitasuna eta ez morrontza “Gidaririk onena da zure bihotza”.
5.
Lanbideko ilaran urtea guztira (e)ta hipoteka zintzurra estutzen ari da. Zure ametsa bada, zoaz Miamira “Zertan geratu lotan ametsei begira? Hemen, ametsak egi bihurtzeko dira”.
6.
Ofizio polita da igeltseritza; andamio gainean nolako paliza! “Larunbatean lana!”, −nagusian hitza− tupperrean atzoko Tarradellas pizza. “Hiru egun dira ta gozatu bizitza”.
7.
Golf pilotaren pare baduzu fistula labankada bihurtu daiteke eztula. Mina handitu arren pilulaz pilula, malkoak lehortzean ez ahaztu sekula: “Minak indartsuago egiten zaitula”.
8.
Guztiok gara hauskor (e)ta giza abere (e)ta gorabeherak dira bizitzaren lege. Nire sortak nahiz ez zu(e)n laguntzea xede, bertsoren batek egin badizu mesede, beharbada ez zaude horren gaizki ere. (Bis)
