Txintxarritxo ardia

2022-01-12

Ardi baten bizitzaren berri ematen digun kopla sorta. Haurrei zuzenduta.

Arditxo txuri bat naiz
polita, gizena,
Txintxarritxo ipini
zidaten izena.

Astoa arrantzaka,
txakurra atean,
zoriontsu bizi naiz
baserri batean.

Nahiz eta artilea
eraman soinean,
gauez lo egiten dut
iratze gainean.

Artzainak eskuz jetzi
ohi nau egunero,
gazta eta mamia
egiteko gero.

Joan den azaroan
Bixi etorri zen,
arkume txiki baten
ama egin nintzen.

Titian ez badaukat
erdi belauniko,
eguna ematen du
salto eta brinko.

Udaberri garaia
iristearekin,
mendira joaten naiz
beste ardiekin.

Orain eguzki goxo,
orain behe-laino,
hantxe egoten gara
udazkeneraino.

Baserrira itzultzen
gara negurako,
han babesteko hotza
datorrenerako.

10.

Nire bizitzarekin
oso pozik nago,
hurrena kontatuko
dizuet gehiago.