Gure etxea han dago

Bertsolaria(k): Amets Arzallus
Doinua: Gu gazte ginadela

Amets Arzallusek eta Ibrahima Baldek “Miñan” liburua idatzi dute. Ibrahimak Ginean izandako haurtzaroa eta Europara etortzeko egindako bidaia gogorra azaltzen du. Zer ote datorkio orain burura, “etxea” esanda? *Haurrei zuzendutako sorta.

PDF

Etxola borobil bat zuhaitzen artean
erdi-erdian sua ta bi ahuntz atean
egun batean denei agur esatean
etxea sartu nuen poltsiko batean.

Geroztik ibili naiz haizearen esku
orain zure etxean badut non babestu
ez da gurea bezain ttiki eta estu
baina limoiondorik atarian eztu.

Etxea esan eta zer dator burura?
Lastozko teilatuan hiru *itaxura
bide luzean oinez ekartzen zen ura
nik maitasuna edan nuen putzu hura.

(*)itaxura: itogin

Eta *pularra baitut hizkuntza maitea
gertatzen baldin bada kasualitatea
gure hitzez norbaitek “kaixo” esatea
iruditzen zait gure etxeko atea.

(*)pularra: Mendebaldeko Afrikako hizkuntza

Etxeminez sentitzen badut negargura
eskua poltsikora daramat *ardura
hantxe dauzkat lastoa, buztina ta zura
berriz eraiki eta sartzen naiz barrura.

(*)ardura: etengabe, sarri

Hara nik zenbat dudan katu kosmikotik
edozer eraikiko nuke poltsikotik
urruti egon arren sartzen naiz gogotik
mundua ikusteko etxeko leihotik.