Hitzetik Hortzera saiorako jarritako sorta. Musikariak: Eneko Sierra Lataillade eta Beñat Antxustegi Goikoetxeta.
1.
Hiru pisuko etxe handi bat hondartza aldamenean, Lurrari bira osoa eman “Airstream” baten barnean, igandetako patxada horrekin bizi astelehenean, helduaroaz amesten nuen sarri haurra nintzenean… Baina ametsak horixe dira ametsak, azken finean!
2.
Eta “Ametsez ezin da bizi” kantu baten arabera, berandu baino lehen ohartzen da egia hortaz norbera. Huskeria bat egon liteke sarri zuritik beltzera, ni ere azkar igaro nintzen alde batetik bestera: nahi sakonenak besarkatzetik ezinak besarkatzera.
3.
Errealitate zati osoak, laurdenak edo erdiak jakin ahala oztopo denak dira horren ageriak. Ohartu nintzen behin ez ginela hain “Ken” eta hain “Barbiak”, nahiz abstraitzen saiatzen garen ez ikusteko egiak, besarkadarik motzenak ere umel ditzake begiak.
4.
Egia horiei nola aurre egin deskubritu nahian nabil, beste aldera begiratuta ezin bainaiz bizi trankil. Erantzun bila miatu ditut zenbait sareetako profil, ikusi ditut mila albiste eta Instagrameko “reel”... Buru barneko ahots xumea zerbait esan nahian dabil.
5.
Ahots xumeak ez du ordea buruan asko irauten, hasten baikara itsu-itsuan “mass media”-tik edaten. Diogu: “Zenbat etxegabetze burutu dituzten aurten! Zenbat emaitzik gabeko greba, eskubideen ukapen… Ados, baina nork onartu du Rauwk ta Rosaliak utz dezaten?”
6.
Sareetatik kanpo agian zu zara utzi dutena, lanean eta ikasketetan gustora ez dabilena, beti gainean daraman hori nobela eskapistena, zalantza gabe Hogwarts-erako trena hartuko lukeena… baina antza denez hori guztia ez da inporta duena.
7.
Mundu honetan non gailentzen den betiko aitakeria kondenatzeko borroka grinez esnatzen den gazteria, mundu honetan non bidezkotzat hartu den zurikeria, non horren zaila den bereiztea gezurra eta egia… Gaitz okerrena ez al da gure axolagabekeria?
8.
Gure irrifar antzeztu eta gure ezintasunean uste nuena baino gehiago dugu amankomunean. Beraz arrazoi finez eragin zarata isilunean, irakurri zer dion pankartak hango kale barrenean… Ametsa soilik ez dadin izan amets bat azken finean!
