Donostian, "1935-1967 Txapelketa Nagusien antologia kantatua" emanaldian abestutako sorta. Lehenik, Xalbadorri publikoak jotako txistualdia ekarri zuten oholtzara. Ondoren, Ibarzabalek entzuleari jarritako sorta abestu zuen.
1.
Ikusiaz Xalbador bi begiak biltzen gugan zerbait sortu zen eta zerbait hil zen ozena da frontoi bat txistuka amiltzen baina ozenagoa ahots bat ixiltzen.
2.
Geroztik hemen gaude plazan elkarrekin txistu haiek estali nahian barreekin nahiz ta bertsoro txalo jotzeari ekin zu beti ados egon al zara nirekin?
3.
Jo gabeko txaloa nola aitzen ez den ez dugun batasun bat ai gaude antzezten entzuna ez baduzu gehiegi miresten sumatu izan zaitut txistua irensten.
4.
Aldarria, grazia tonu harroxkoa zuretzat zein ahotan da baliozkoa? Tentagarriago zait zure bekozkoa txaloaldi bat baino konpromisozkoa.
5.
Nola fokuak beti ni argitzen nauen zuk mutu pasa behar ordu eta laurden jakin nahi nuke ea nahi duzuna hau den gure harremanean gustura al zauden.
6.
Nik zure gozamena bilatzen dut berez zuk nirea bilatu dezakezun legez baina ez gaudenetan emateko xedez ez dizut eskatuko eta zuk ere ez.
7.
Zuk maite ez banauzu errurik ez dut nik nik maite ote zaitut? Ez dakit, berdin dit inoiz urrundu arren bestearengandik batzen gaituen zerbait badago oraindik.
Donostiako Antzoki Zaharra, Bilintxen menda zikloa, 2024-04-28.
