Hitzetik Hortzera saiorako jarritako sorta. Musikaria: Manex Pagola.
1.
Hamaikarekin utzi genuen eliza hamabirekin hasi jotzen trikitixa berezia zen gure begien irisa batzuetan marroia besteetan grisa egonkortasunik nahi ez bagenu gisa.
2.
Makillajez estali genuen kutisa eredutzat hartuta Espainiako missa hamalau urterekin handitzeko prisa gura barik zabaltzen zitzaigun pelbisa emakume bihurtu nahi bagenu gisa.
3.
Udaberrian palak udan frontenisa udazkenean kartak neguan partxisa Nokia txiki baten snake ta tetrisa musean edandako lehenengo Baileysa jolasari eutsi nahi bagenio gisa.
4.
Metropolitik urrun geneukan polisa ez genekien zer zen kotxeko poliza busean joatearen tortikulitisa izaten zen bidaia guztien premisa joatea sufritzea baldin balitz gisa.
5.
Transfeminismoaren lehenengo peskiza Maddalen Arzallus ta Miren Amuriza pintadekin zikindu genuen frontisa presoen omenezko lehenengo brindisa mundua aldatzera bagindoaz gisa.
6.
Brometan egindako zure estriptisa lehenengo pelikula ixa, ixa, ixa isilpean gustatzen zitzaigun aktriza batera egitea kotxepera pixa sexuaren beldurrak ez bageunde gisa.
7.
Kopetan nere erruz duzu zikatriza elkarri pasatako gastroenteritisa nere biriketara zuen kanabisa igandeko Cheetosak ta erregaliza bizitza partekatzen bageneki gisa.
8.
Plazako haritzaren udako geriza bainatu eta gero errekaren brisa SuperPopeko zenbat sasi pitonisa egiten geroaren urrezko krokisa etorkizuna jakin nahi bagenu gisa.
