Kirol lehiari buruz bertso sorta hau jarri zuen Iñaki Artolak, bere bertso eskolako ikasleekin abesteko. Musikatuta ekarri dugu Bertsoikasgelara. Entzun eta... izango dugu gero zer hitz egina! Nola bizi dugu guk lehia?
Galdu ta irabazi irabazi, galdu bataren bila eta bestea azaldu onenak ere hortik ez daudela salbu gogoan izatea komeniko zaigu.
2.
Tarteka jolastea oso ondo dago guk aukeran ordea jokatu nahiago musean ere berdin: txikira hordago! Hori bai, galtzeko prest egon beharra dago.
3.
Ekartzen duen arren batzutan negarra pena ta zer hobetu pentsatu beharra galtzean pizten da maiz barruko indarra mingarria da baina ez da beti txarra.
4.
Batzuk aitzaki bila beti eta nonahi bere bikoteari errua bota nahi horrela dabilena nahastuta dabil, ai! Partida gal lezake laguna ere bai.
5.
Inorri ez baitzaio galtzea gustatzen ni ere aritzen naiz biraoka ozen pilota ostikoz ta harrika botatzen ta gero pentsatzen dut: hainbesterako al zen?
6.
Irabaztea dugu gauza mundiala poztu eta ospatu behar den bezala! Ikusiz saiatzeak saria daukala lanean jarraitzeko balio dezala!
7.
Aurkarien aurrean bazabiltz saltoka ez ahaztu borobila dugula pelota hurrena zu geratu zintezke lur jota beraz, kontuz ibili gandorra igota.
8.
Biek ere badute arriskurik berez: galtzean sentitzea txar hutsa ahalez irabaztean berriz jainko txiki bat lez bata ez da egia bestea ere ez.
9.
Kirolak jarri arren bat bere lekuan batzuk behean eta besteak altuan sari potoloa ez dator talentuan baizik eta gozatzen dugun momentuan.
10.
Kantxa baten barruan nahiz aldageletan hau da, jokoan bertan nahiz harremanetan guztion helburua ez al da benetan onena ematea zentzu guztietan?
11.
Lehiak ze irakaspen ta dibertimendu kantxan hasi ta buka egingo bagendu ta beti kirolaren mugetan mantendu handik kanpo mesede gutxi egiten du.
12.
Irabazi ta galdu galdu, irabazi bi aurpegiak txanpon berean doazi edozein alorretan nahi badugu hazi horixe da erronka: bitatik ikasi.
HITZ EGIN DEZAGUN LEHIAZ
Bertso sorta entzunda, izango dugu gelan zertaz hitz egina, lehiari buruz... Goza dezagun gure arteko elkarrizketaz!
Solasaldirako gaiak
-Bertso bakoitzak mezu bat dakar, norgehiagokaz. Zein da gutako bakoitzari gehien gustatu zaion bertsoa? Zergatik?
-Galtzeari buruz, hala dio Artolak: "mingarria da baina / ez da beti txarra". Bidean, zertan lagundu dezake galtzeak?
-Sortan egoera ezberdinak azaltzen dira, lehiakideen arteko harremanei buruz: errua bikoteari botatzea, garaipena "gandorra igota" ospatzea... Guri ere gertatu al zaizkigu antzeko egoerak? Zein dira gogoan ditugun gertaerak?
-Gustatzen al zaigu kirolean lehiatzea? Zergatik?
-Lehiak, kiroletik kanpo, mesede gutxi egiten duela dio 11. bertsoak. Eguneroko bizitzan, gure artean, zein gaietan nabari dugu lehian sartzen garela, besteak baino hobea izan nahian? Besteekiko konparaketak eta gailendu nahiak, on edo kalte egiten digu?
Errematatzera joan eta... txapa!
Bertso sortan behin jo du pilotak txapan. Akatsak ere bidearen parte direnez eta ikasteko balio dutenez, sorta halaxe uztea erabaki du Iñakik: txapa hots eta guzti. Gure belarriak antzeman al du?
ARTOLA ETA ALTUNA, LEHIAZ ELKARRIZKETAN
Argian Estitxu Eizagirrek lehiari buruz elkarrizketa hau egin zien Iñaki Artola eta Jokin Altuna pilotariei. Irabazteaz eta galtzeaz izandako solasaldi honetxek piztuta jarri zuen gero Artolak bertso sorta, Alegiko bere bertso eskolako ikasleekin abesteko.
ARTOLA, BERTSO ESKOLAKO IRAKASLE
Hitzetik Hortzera telebista saioan Mirari Martiarenak eginiko elkarrizketa hemen ikusgai, pilotariak bertsolaritzarekin duen harremanaz. Herriko bertso eskolako irakaslea ere bada Iñaki.
