Iruñean (Nafarroa Garaia) sortua da 1991ko urtarrilaren 17an, eta bertan bizi da. Kazetaritzan lizentziatua da, eta Gizarte Antropologia eta Genero Berdintasuna master ikasketak ditu. Kazetaritza ikasketak egina izaki, lagintza horretan aritu da hainbat idatzizko medioetan eta baita irratian ere: Berria, Argia, Nafarroako Hitza, Euskalerria irratia... Nafarroako Bertsozale Elkartearen hezkuntza programan dihardu 2018. urtean hasita, bertsolaritza ikastetxeetan hedatzen. Antsoaingo Bertso Eskolan hasi zen bertsotan eta, besteak beste, Lekunberriko Bertso Eskolan eta Iruñerriko Gazteen Bertso Eskolan ere ibili da geroztik. Garaiko bertsolari gazte ia guztiek bezala, lurraldeko Eskolarteko Bertsolari Txapelketan izan zuen lehen igurtzia bertso-plazan, eta, batik bat, bertsolari gazteentzat antolatzen diren ...
Ikusi gehiago
Iruñean (Nafarroa Garaia) sortua da 1991ko urtarrilaren 17an, eta bertan bizi da. Kazetaritzan lizentziatua da, eta Gizarte Antropologia eta Genero Berdintasuna master ikasketak ditu. Kazetaritza ikasketak egina izaki, lagintza horretan aritu da hainbat idatzizko medioetan eta baita irratian ere: Berria, Argia, Nafarroako Hitza, Euskalerria irratia... Nafarroako Bertsozale Elkartearen hezkuntza programan dihardu 2018. urtean hasita, bertsolaritza ikastetxeetan hedatzen.
Antsoaingo Bertso Eskolan hasi zen bertsotan eta, besteak beste, Lekunberriko Bertso Eskolan eta Iruñerriko Gazteen Bertso Eskolan ere ibili da geroztik. Garaiko bertsolari gazte ia guztiek bezala, lurraldeko Eskolarteko Bertsolari Txapelketan izan zuen lehen igurtzia bertso-plazan, eta, batik bat, bertsolari gazteentzat antolatzen diren sariketeta ugarietan parte hartuz eman zioen jarraipena: Nafarroako Eskolarteko Bertsolari txapelduna izan da 2008an eta 2009an, eta Mariano Izeta sarikoa jantzi du 2014an; finalista izan da beste askotan eta txapeletik hurbil ibili da hainbatetan.
Hemezortzi urte bete orduko hasi zen parte hartzen Nafarroako Bertsolari Txapelketan; Txapelduna izan da 2021ean, eta finalista 2023an eta 2025ean. Euskal Herriko Bertsolari Txapelketari dagokionez, 2022an hartu du parte lehenengoz eta finalaurrekoetako azken faseko taldean sartu da.
Bertsolaritzaren beste alor batzuk ere jorratzen ditu. Bertso-jartzaile saritua da, Iruñeako Betso-paper lehiaketa bi bider irabazi du esate baterako, eta, bertso-irakaskuntzan dihardu.
Bertsogintza ez ezik, oso gaztetatik ari da jorratzen sorkuntza idatziko beste alor batzuk. Literaturan, narratiba zein poesia lantzen du, eta bi distiplinetan nabarmendu da hainbat sari eskuratuz: Iruñeako Udalaren Egile Berriendako Euskarazko Literatur Lehiaketan askotan izan da saritua (beste batzuren artean, narratibako 1. saria 2020 eta 2021ean), Bilboko Udalaren Gabriel Aresti kontakizun lehiaketa (1. saria, 2022), Udabiltzaren Geuretik Sortuak beka (2023), Igartza literatur-sorkuntzarako beka (Beasaingo Udala-CAF-Elkar, 2025)...; azken honi uko egin dio, bere hitzetan, "palestinar herriaren kontra Israel gauzatzen ari den genozidioan CAFek inplikazioa duela salatzeko".
Ikusi gutxiago
